Raportoi për Gazeta Shëndeti: Anjela Hajdari
Sot nisi viti i ri akademik 2023-2024. Rreth 20 mijë studentë do të ulen për herë të parë në bankat e universiteteve.
Ndërkohë që studentët e vitit të parë të Fakultetit të Mjekësisë akoma nuk janë njohur me organizimin dhe funksionimin e procesit mësimor apo edhe me grupet e tyre, siç duket kjo situatë do i shtyhet për më vonë, sepse studentët e mjekësisë nuk e kanë nisur procesin mësimor si zakonisht. Bluzat e bardha të së ardhmes, duke filluar që nga viti i dytë e më tutje, kanë bojkotuar auditorët dhe po protestojnë kundër ligjit që i detyron të punojnë në Shqipëri 5 vite pas përfundimit të studimeve.
Studentët e vitit të parë u njohën me ligjin para aplikimit për universitet, ndërsa ky ligj nuk është pritur mirë nga studentët që tashmë po vazhdojnë fakultetin. Studentët shprehen se bojkoti i mësimit do të vazhdojë deri në fund të javës dhe se nuk kanë kompromis me ligjin e ri. Ato duan të kenë lirinë e tyre për të vendosur për të ardhmen. Gjithashtu kanë penguar disa pedagogë të hynin në mësim dhe i kanë detyruar të kthehen.
Studentët janë të vendosur ta çojnë ligjin në Gjykatën Kushtetuese.
Ligji për mjekët e rinj i detyron studentët e Mjekësisë që të punojnë deri në pesë vite në Shqipëri, përpara se të marrin diplomën, ose në të kundërt do të duhet të paguajnë tarifat e studimeve.
