Arlinda Gjypi
Gjykata e Tiranës vendosi sot që të shtyjë seancën përgatitore me palë Spitalin Amerikan kundër gazetës “Shëndet+” dhe shoqatës “Together for Life”. Shkak për këtë ishte mosparaqitja e provave nga ana e palës paditëse, gjë për të cilën gjykata dha kohë dhe vendosi shtyrjen e seancës për me datën 25 korrik.
Në padinë e ngritur, Spitali Amerikan kërkon nga gazeta dhe shoqata përgënjeshtrim të lajmit të publikuar më 26 prill 2016 në faqen online të gazetës “Shëndet+”. Në këtë shkrim, të bazuar në dokumente dhe deklarata të pacientëve të cilët marrin shërbimin e hemodializës në këtë spital, deklarohet se Spitali Amerikan nuk ofron sipas paketës së shërbimit të hemodializës shërbimin e lavanderisë dhe ushqimit.
Nga ana e spitalit është pretenduar se këto shërbime nuk janë në kontratën e tij me Fondin dhe se nuk paguhet për këtë. Gjithsesi, gazeta “Shëndet+” pritet të sjellë me fakte se sigurimi i këtyre shërbimeve përfshihet në paketën prej 11204 lekë të rinj që jep shteti shqiptar për çdo seancë hemodialize.
Të pranishëm në seancën e sotme ishin edhe përfaqësues të medias dhe shoqërisë civile./ https://shendeti.com.al/
