Ministri i Shëndetësisë ishte për një vizitë në Spitalin e Traumës për të inspektuar punimet për godinën e re të shërbimit të urgjencës, nga ku preku dhe çështjen e debatuar kohët e fundit: urdhrin e Kryeministrit për të ndryshuar sërish varësinë e 
spitalit nga Ministria e Shëndetësisë në atë të Mbrojtjes. Me gjithë kundërshtimet e aleatit kryesor në qeverisje, opozitës dhe një pjese të komunitetit të mjekëve, ministri nuk dha asnjë shenjë se vendimi mund të ndryshojë.
Ministri Beqaj tha: “Mendoj se për këdo qytetar ose pacient pak rëndësi ka nga kush është varësia administrative e spitalit. Qytetarët shqiptarë do të kenë gjithmonë e më shumë një qendër kombëtare traume që i shërben atyre. Dua të garantoj mjekët dhe infermierët se Ministria e Shëndetësisë do të ketë një rol primar në drejtimin e përditshëm të veprimeve që kryen spitali”.
Qeveria ka financuar me 85 milionë lekë krijimin e shërbimit kombëtar të urgjencës dhe godina e re po ndërtohet pranë Spitalit Ushtarak. Punimet priten të përfundojnë brenda dy viteve të ardhshme.
