Ekipi i mjekëve në repartin e neurokirurgjisë pranë QSUNT ka realizuar një ndërhyrje kirurgjikale të quajtur DBS (Deep Brain Stimulation), ose Stimulimi i Thellë i Trurit).
Ndërhyrja është bërë te një paciente e moshës 50-vjeçare e diagnostikuar me sëmundjen e Parkinsonit.
Lajmi është bërë i ditur nga ministrja e Shëndetësisë dhe Mbrojtjes Sociale, Albana Koçiu përmes një postimi në rrjete sociale.
Teksa ka falenderuar mjekët për ndërhyrjen, Koçiu thotë se kjo ndërhyrje specifike dhe tejet e domosdoshme për trajtimin e Parkinsonit, mbulohet tërësisht nga buxheti i shtetit.
“Në Shërbimin e Neurokirurgjisë, në QSUNT u krye një ndërhyrje e suksesshme – DBS (stimulimi i thellë i trurit) për sëmundjen e Parkinsonit, tek një paciente 50 vjeçare. Kjo ndërhyrje specifike dhe tejet e domosdoshme për trajtimjn e Parkinsonit, mbulohet tërësisht nga buxheti i shtetit, duke sjellë 0 (zero) kosto për pacientin.
Mirënjohje për ekipin mjekësor: Prof. Dr. Artur Xhumari, Prof. Dr. Ridvan Alimehmeti, Dr. Gramoz Brace, anestezist-reanimator Dr. Mithat Demneri, neurologet Dr. Shk. Florian Dashi, Prof. Ilirjana Zekja, Specializantët: Dr. Aurora, Dr. Kejsi, Dr. Sidorela, si dhe infermieret: Manjola Pjetri, Ganimete Arapi dhe Anxhela Gjonaj”, shkruan Koçiu.
Stimulimi i thellë i trurit (DBS) përfshin implantimin e elektrodave brenda zonave të trurit. Elektrodat prodhojnë impulse elektrike që ndikojnë në aktivitetin e trurit për të trajtuar kushte të caktuara mjekësore. Impulset elektrike gjithashtu mund të ndikojnë në qelizat dhe kimikatet brenda trurit që shkaktojnë kushte mjekësore.
Sasia e stimulimit të thellë të trurit kontrollohet nga një pajisje e ngjashme me stimuluesin kardiak të vendosur nën lëkurë në pjesën e sipërme të gjoksit. Një tel që udhëton nën lëkurë e lidh këtë pajisje me elektrodat në tru.
Stimulimi i thellë i trurit përdoret zakonisht për të trajtuar një sërë kushtesh, të tilla si:
- Sëmundja e Parkinsonit
- Gjendjet që shkaktojnë distoni, siç është sindroma Meige
- Epilepsia
- Sindroma Tourette
- Çrregullimi obsesiv-kompulsiv
Stimulimi i thellë i trurit përdoret te njerëzit, simptomat e të cilëve nuk kontrollohen me ilaçe.
Stimulimi i thellë i trurit në përgjithësi konsiderohet të jetë me rrezik të ulët. Por çdo lloj operacioni ka rrezikun e komplikimeve. Gjithashtu, vetë stimulimi i trurit mund të shkaktojë efekte anësore./shendeti.com.al
