Me sloganin “Jeta mbi të gjitha”, studentët e universitetit “Aleksandër Moisiu” të Durrësit protestuan mesditën e së premtes kundër ndotjes që shkakton vendgrumbullimi i mbetjeve urbane në Porto Romano dhe cenimit të së drejtës për të jetuar.
Studentet këtë të premte kanë lënë orët e mësimit dhe kanë dalë në protestë duke kërkuar zhvendosjen e vendgrumbullimit të mbetjeve larg zonës së universitetit.
Në letren e tyre dërguar pushtetit vendor dhe mediave, ata sqarojnë se menaxhimi i mbetjeve në këtë vendgrumbullim kryhet prej vitesh në shkelje të ligjit, ndërsa duhej të ishte mbyllur në vitin 2015 për të nisur rehabilitimin e zonës, gjë e cila nuk ka ndodhur.
Studentët i kërkojnë Bashkisë së Durrësit, Ministrisë së Mjedisit dhe qeverisë që të ndërhyjnë për të marrë masa të menjëhershme për të mos hedhur me plehra në këtë zonë, për të kontrolluar mos djegien e plehrave që janë aty e për të nisur gjithashtu edhe largimin e mbetjeve nga vendgrumbullimi për të shkuar deri në fund tek rehabilitimi i zonës, që është kthyer në një vatër sëmundje e kërcënimi serioz të jetës për 20 mijë studentë dhe mijëra banorë.
