Përshtati në shqip për Shëndeti Online dhe gazeta “Shëndet+”: Blertina Koka
Të qenët me diabet mund të jetë shenja e parë paralajmëruese e një prej formave më vdekjeprurëse të kancerit, kanë zbuluar shkencëtarët.
Gjysma e pacientëve të diagnostikuar me kancer të pankreasit kanë treguar se janë diagnostikuar me diabet të tipit 2 një vit më parë.
Kjo sëmundje është shumë e vështirë të diagnostikohet në fazat e saj të para, duke qenë se simptomat janë shpesh të rralla. Shumica e zbulojnë atë kur është shumë vonë dhe nuk mund të shërohet.
Shkencëtarët shpresojnë që me diagnostikimin e diabetit të mund të përcaktojnë edhe rrezikun për zhvillimin e kancerit.
Një ekip me shkencëtarë nga e gjithë bota analizuan të dhënat mjekësore të gati 1 milion italianëve dhe belgëve që vuanin nga diabeti i tipit 2 dhe kishin zbuluar së fundmi se ishin prekur nga kanceri i pankreasit. Gati 50% e tyre ishin diagnostikuar me këtë sëmundje brenda vitit që kishin marrë vesh se vuanin nga diabeti.
Hulumtuesit shkencorë zbuluan gjithashtu se ata ishin 4 herë më të rrezikuar që të diagnostikoheshin me kancer në 3 muajt e para të trajtimit të diabetit.
Të dhënat mjekësore dhe llojet e ilaçeve që marrin për diabetin mund të shërbejnë për të zbuluar ata që janë në rrezik, thonë shkencëtarët nga Instituti Ndërkombëtar i Kërkimit në Lion të Francës.
Rezultatet e këtij studimi u bënë të ditura gjatë Kongresit Evropian të Kancerit 2017, në Amsterdam.
Burimi: Daily Mail / https://shendeti.com.al/
