Elena Beta, gazeta “Shëndet+”
Ambasada Holandeze, në kuadër të presidencës holandeze në BE, organizoi sot Festivalin Europian të Ciklizmit në Tiranë “Let’s Bike Tirana”, festë e cila mblodhi bashkë, përfaqësues të Ambasadës Holandeze e të trupave diplomatikë, ambasadorë të BE-së, përfaqësues të shoqërisë civile, aktivistë e gjimnazistë të apasionuar pas biçikletave. Z. Erion Veliaj Kryetari i Bashkisë së Tiranës, në fjalimin e tij përshëndetës falenderoi të gjithë stafin e ambasadës për këtë nismë që morrën. “Unë e kam thënë gjithmonë, ka investime në infrastrukturë dhe investime në kulturë, të dyja kanë të njëjtën rëndësi, ky i sotmi është edhe një investim në infrastrukturë nga ana e bashkisë me rrugën e re ku shihet një korsi për biçikletat, por edhe një investim në kulturë me këtë organizim fantastik të Ambasadës Holandeze”, vijoi Veliaj duke nxitur të gjithë të rinjtë të përdorin më shumë biçikletat si mjet transporti në përditshmëri.
Oljana Prifti Zv. Ministre e Ministrisë së Mjedisit ftoi të gjithë qytetarët të kontribuojnë për një mjedis të shëndetshëm duke i dhënë përparësi transportit me biçikleta në vend të atij me makina. “Pedaloni më shumë, ofrojini më shumë jetë fëmijëve tuaj”, përfundoi ajo.
E pranishme në aktivitet ishte dhe, Ambasadorja Holandeze në Tiranë, Zj. Dewi van de Weerd e cila pedaloi sëbashku me Kryetarin e Bashkisë dhe pjesën tjetër të të pranishmëve duke dhënë një mesazh të rëndësishëm për të gjithë. “Ta bëjmë Shqipërinë si Hollanda, ti duam më shumë biçikletat”.
Aktiviteti vijoi me pedalimin e përbashkët drejt ambientetve të Ambasadës me fituesit e konkursit “Shkrepe për mjedisin”, pjesë e së cilëve ishte edhe shoqata “Together for Life”. Në vijim Zj. Dewi van de Weerd , shpalli çmimet për 3 fotot më të vlerësuara nga juria duke shprehur vështirësinë që juria pati në përzgjedhjen e 3-shes fituese si dhe bëri me dije pjesëmarrësit se 10 fotot e përzgjedhura, do të ekspozohen në Festivalin Evropian të Ciklizmit .
Fotot e të gjithë konkurentëve u ekspozuan dhe u komentuan nga përfaqësues të Ambasadës, si dhe nga vetë autorët të cilët rrëfyen pak më shumë rreth prapaskenës së fotove dhe rëndësisë që biçikletat kanë në jetën e tyre të përditshme. Festa kushtuar këtij mjeti kaq të dashur për miqtë holandezë, vijoi në ambjentetet e Ambasadës Holandeze mes fituesve, pedaluesve, e dashamirësve të fotove dhe artit.
