Denisa Canameti, gazeta “Shëndet+”
Me vendim të ministrit të Shëndetësisë, prej datës 1 shkurt 2016, edhe personat e pasiguruar do të vizitohen falas te mjeku i familjes.
Këta persona gjithashtu do të kenë tarifa të ulura për rastet kur do të kryejnë analizat ose do të dërgohen nga mjeku i familjes te specialisti. Vizitat për te mjeku specialist ulen nga 1500-2000 lekë në 100 lekë, ndërkohë që vizitat te mjeku specialist i spitalit universitar ulet nga 3000 lekë në 500 lekë.
Ndërkohë, për personat që nuk veprojnë sipas sistemit të referimit, tarifat mbeten të njëjta.
Ajo që duhet theksuar është se, sipas vendimit të ri, tarifat e reja të ulura do të zbatohen vetëm te personat të cilët zbatojnë sistemin e referimit, pra që shkojnë së pari te mjeku i familjes, marrin prej tij rekomandimin te specialisti dhe më tej veprojnë sipas asaj që u thotë specialisti.
Personat që nuk zbatojnë sistemin e referimit, qofshin të siguruar apo jo, do të paguajnë tarifa të plota. Bashkangjitur shkrimit gjeni edhe tarifat e reja të siguruara nga gazeta “Shëndet+”.
