Përfaqësues të shoqatës “Together for Life” zhvilluan sot një takim në Ambasadën Suedeze në Tiranë me konsullen Znj. Birgitta Jansson, njëkohësisht shefe e Bashkëpunimit Suedez për Zhvillim në Shqipëri. Takimi u krye me qëllim njohjen e punës së shoqatës “Together for Life” në kuadër të barazisë gjinore dhe mbrojtjes së të drejtave të njeriut e më veçanërisht atë të pacientëve në Shqipëri.
Drejtoresha e shoqatës “Together for Life”, znj. Eglantina Bardhi, njohu konsullen suedeze me situatën dhe vështirësitë me të cilat hasen gratë në Shqipëri qoftë në jetën e tyre të përditshme, por veçanërisht ato të lidhura me shërbimin shëndetësor.
“Shoqata Together for Life ka qenë gjithnjë në oponencë me çdo qeveri në vendin tonë, kjo referuar sidomos sektorit të shëndetësisë, i cili ende sot vazhdon të jetë një plagë. Në këtë drejtim kemi bërë një punë të madhe për të ngritur zërin për të drejtat e pacientëve, të drejta të cilat duke qenë se nuk njihen, shkelen pa asnjë përgjegjësi”, u shpreh znj. Bardhi.
Koordinatorja Arlinda Gjypi u shpreh se dhënia zë pacientëve është një nga misionet e kësaj shoqate. “Puna jonë është e vështirë pikërisht për shkak se ne duam të mbrojmë pacientët që deri më sot e kanë ndier veten të pafuqishëm. Mbrojtja e zërit të tyre është edhe një mënyrë për ta ndryshuar situatën në Shqipëri. Me hapa të vegjël mund të mbërrijmë aty ku duhet”, tha znj. Gjypi.
Konsullja Znj. Birgitta Jansson tha se mbrojtja e të drejtave të njeriut është shumë e rëndësishme për Ambasadën Suedeze dhe se ata e inkurajojnë shoqërinë civile që të vazhdojë të punojë në këtë drejtim.
Në fund, në respekt të mbështetjes së madhe që Ambasada Suedeze ka dhënë për parandalimin dhe eliminimin e dhunës ndaj grave dhe vajzave në Shqipëri, nga ana e shoqatës “Together for Life” konsulles Jansson iu dhurua një punim në allçi, realizuar nga 19-vjeçari Renaldo, nxënës i Liceut Artistik në Tiranë. Punimi “Fillesa” ishte një nga punimet fituese të ekspozitës “Gruaja përmes Artit”, organizuar nga shoqata “Together for Life” në kuadër të projektit “Ai dhe ajo krijojnë jetën. Bëje botën portokalli”, si pjesë e Fushatës Ndërkombëtare UNiTE, “16 ditë aktivizëm kundër dhunës me bazë gjinore”, e mbështetur nga Organizata e Kombeve të Bashkuara në Shqipëri dhe me fonde të Qeverisë Suedeze.
