Të qenët mbipeshë ul rrezikun e degjenerimit të trurit (demencës). Ky është përfundimi i një studimi të botuar në revistën “Lancet Diabetes & Endocrinology”. 
Grupi kërkimor analizoi kartelat klinike të rreth dy milionë personave me moshë mesatare 55 vjeç dhe me një tregues peshe trupore 26.6 (që tregon mbipeshë) për rreth 20 vjet.
Analiza e tyre tregoi se personat nën peshë kishin një rrezik 39% më të lartë për të vuajtur nga demenca krahasuar me ata që kishin një peshë të shëndetshme, ndërkohë që ky rrezik ulej me 18% për ata që sipas treguesve ishin mbipeshë dhe ulej me 24% për ata që klasifikoheshin si obezë.
“Mund të flitet për rezultate befasuese”, u shpreh një nga autorët e studimit. Kjo për faktin se vë në diskutim ekuilibrat peshë e shëndetshme fizike dhe shëndet i mirë mendor. “Është e çuditshme që personat mbipeshë dhe obezë kanë më pak rrezik për t’u prekur nga demenca krahasuar me ata që kanë një peshë trupore që quhet e shëndetshme. Sigurisht ende është për t’u parë se çfarë e shkakton këtë mbrojtje të trurit, megjithatë kjo nuk nënkupton se është mirë të jesh mbipeshë apo obez. Megjithëse ka një efekt mbrojtës, – përmbyll studiuesi, – nëse jeni mbipeshë mund të mos rroni shumë gjatë për t’ia ndjerë përfitimet”./ANSA
Përshtati në shqip: A.Gjypi
