Tenderin e shëndetësisë për check-upin te moshat 40-65 vjeç e ka fituar një kompani cigaresh. 730 milionë lekë është shuma që Ministria e Shëndetësisë i ka dhënë kompanisë “Marketing & Distribution” për realizimin e kontrollit shëndetësor bazë për grupmoshat 40 – 65 vjeç.
Kompania në fjalë e ka lidhur kontratën për financimin e shërbimit me Fondin e Sigurimeve të Kujdesit Shëndetësor më 7 janar të këtij viti. Në tenderin e kryer konkurruan edhe kompani të tjera, gjithsesi tenderi u fitua nga “Marketing & Distribution”, në partneritet me “Trimed”. Fatkeqësisht, të dyja këto kompani kanë pronar të njëjtë, gjë që bie ndesh me lidhin kur bëhet fjalë për tenderat.
Nga ana tjetër “Marketing & Distribution” është një kompani e specializuar në importin, shpërndarjen dhe tregtimin e një shumëllojshmëri produktesh ku përfshihen: produkte për përdorim vetjak dhe shtëpiak, ushqime dhe pije, alkool dhe cigare, zyra dhe kancelari, telefoni celulare.
Nga të dhënat në faqen e lëvizjeve buxhetore të vitit 2014 rezulton se Ministria e Shëndetësisë përgjatë vitit 2014 ka pasur një tjetër kontratë me këtë kompani për letër fotokopje, për të cilën i ka paguar asaj 535 000 lekë.
Megjithëse është folur shumë për check-up-in falas, që gjithsesi paratë janë të taksapaguesve shqiptarë, në të vërtetë ky kontroll shëndetësor nuk ka filluar ende.
