Shoqata “Together for Life” realizoi sot në Qendrën e hemoglobinopatisë, në Spitalin “Ihsan Çabej”, Lushnjë, një sesion informues me pacientët dhe të afërmit e tyre. Pjesëmarrësit u informuan nga dy ekspertët ligjorë, Ledia Muraku dhe Gridi Shehu, mbi të drejtat e tyre në sistemin shëndetësor, kuadrin ligjor ku mund t’i drejtojnë ankesat e tyre në rastet e keqmenaxhimit apo keqmjekimit nga ana e përfaqësuesve të sistemit shëndetësor dhe ku mund të marrin zgjidhje për problemet që kanë.
Në sesionin e diskutimeve që u zhvillua gjatë takimit informues, pacientët ngritën disa çështje problematike të sistemit shëndetësor, por sidomos mungesën e gjakut për transfuzion, tepër e rëndësishme për jetën e këtyre pacientëve.
“Together for Life” do të asistojë pacientët dhe familjarët e tyre në ndjekjen në rrugë ligjore në gjykatë dhe në të gjitha institucionet shtetërore.
Ky aktivitet u realizua në në kuadër të projektit “Forcim i zbatimit të të drejtave të pacientëve përmes advokimit dhe mbrojtjes ligjore“, i cili mbështetet nga Agjencia e Shteteve të Bashkuara për Zhvillim Ndërkombëtar (USAID).
