Përgatiti për gazetën “Shëndet+”: Elena Beta
8 Marsi, ishte data që mblodhi në një tryezë të rrumbullakët individë të interesuar, përfaqësues si dhe anëtarë të organizatave, pjesë e lëvizjes “Kundër Gjuhës së Urrejtjes/No Hate Speech” në Shqipëri, për të folur mbi parandalimin e gjuhës së urrejtjes mbi seksizmin.
Gjatë takimit të organizuar nga Ministria e Mirëqenies Sociale dhe Rinisë ne bashkpunim me organizatat, pjesë e Komitetit “No Hate Speech Albania”, pranë Qendrës Rinore Tiranë, u bë prezantimi i fushatës së gjuhës së jo urrejtjes.
Në fokus të diskutimeve ishin tema lidhur me gjuhën e urretjes mbi seksizmin, sa e përhapur është ajo në Shqipëri si dhe roli që luan media në parandalimin e saj nga përditshmëria.
Forcimi i imazhit të femrës, duke e parë atë të barabartë me mashkullin, jo inferiore, ishte mesazhi që ky diskutim kishte për qëllim të përcillte, tha për gazetën “Shëndet +” Luis Bekteshi, pjesë e grupit të aktivistëve online për lëvizjen “No hate Speech’ si dhe një nga ideatorët e takimit.
Gjatë takimit u prezantua dhe projekti “Be a man/bëhu burrë”, i cili ka si qëllim edukimin e të rinjve për parandalimin e dhunës në të ardhmen. Synimi i “Be a man/bëhu burrë”, është të krijohen burra dhe baballarë më të mirë për shoqërinë tonë në të ardhmen, prandaj dhe temat tek të cilat fokusohet janë dhuna me bazë gjinore, barazia gjinore, bullizmi, etiketimi etj, vijoi Bledar Zeneli, koordinator i projektit pranë Linjës së Këshillimit për Burra dhe Djem.
Në vijim pjesëmarrësit folën rreth eksperiencave të tyre lidhur me diskriminimin me të cilin përballen gratë në botë e kryesisht në Shqipëri, ku si shoqëri patriarkale, jemi shumë të prekur nga ky fenomen.
Luftimi i diskriminimit ndaj femrës dhe ngritja e zërit kundër sjelljeve abuzuese që mund të bëhen ndaj tyre janë çështje të rëndësishme, gjithmonë në fokus të lëvizjes “No Hate Speech”, duke nxitur burrat dhe djemtë të bëhen avokatë dhe agjentë të ndryshimit për arritjen e barazisë gjinore dhe të drejtave të grave.
