Pas trafikut të ilaçeve kundër kancerit të vjedhura e pastaj të falsifikuara fshihen organizatat kriminale. Kështu u shpreh drejtuesi i zyrës Antitrafik të Agjencisë Farmaceutike Italiane, Domenico Di Giorgio i cili deklaroi: “Bëhet fjalë për krimin e organizuar”. Agjencia italiane ANSA raporton se ky rrjet i organizuar është shtrirë në gjithë Evropën duke vjedhur ilaçe kundër kancerit në spitale ose nga kamionët e përdorur për shpërndarjen dhe duke ndërhyrë në përbërësit aktivë e duke i zëvendësuar me substanca të tjera më ekonomike e pastaj duke i rivënë në treg.
Sipas drejtuesve të zyrës Antitrafik, ky rezulton të jetë shkaku i shtimit të vjedhjeve të farmacive në Itali, por edhe në Evropë. Në të vërtetë, nuk bëhet fjalë për raste të veçanta, por për episode që cilësohen si vepër e rrjeteve tepër të organizuara. Baza e veprimeve kriminale duket se është në Itali, por veç organizatës “Kamorra” rezulton të jenë përfshirë edhe klane të Evropës lindore. / A.Gjypi
