Një vajzë 25-vjeçare ka ndërruar jetë në Qendrën Spitalore Universitare Nënë Tereza në Tiranë, pasi kishte konsumuar fostoksinë.
25-vjeçarja, e cila ishte shtatzënë, sipas hetimeve paraprake dyshohet se aktin e rëndë e ka kryer për shkak të dhunës nga ish-bashkëshorti i saj, i cili tashmë është shpallur në kërkim nga Policia e Shtetit.
“Specialistët për Hetimin e Krimeve të Komisariatit të Policisë Nr. 2 shpallën në kërkim, për veprat penale “Dhuna në familje” dhe “Shkaktimi i vetëvrasjes”, shtetasin E. F., 25 vjeç, pasi dyshohet se ka ushtruar dhunë ndaj të dashurës së tij, veprim i cili dyshohet se është bërë shkak që shtetasja të konsumojë fostoksinë. Si pasojë, ajo ka humbur jetën në spital. Punohet intensivisht për lokalizimin dhe kapjen e 25-vjeçarit, si dhe për sqarimin dhe dokumentimin e rrethanave të rastit”, njoftoi Policia.
Në trupin e të resë janë konstatuar edhe shenja të rënda dhune në pjesën e kokës, fytyrës dhe në njërin krahë, të cilat dyshohen se janë shkaktuar nga dhuna e ushtruar nga ish-partneri i saj, Eraldo Fizi.
Para se të ndërmerrte aktin fatal, 25-vjeçarja kishte lënë edhe një letër. Sipas burimeve, në të ajo shkruante se nuk donte më që ata njerëz që i kishin bërë keq të vazhdonin ta lëndonin. Në fund të letrës, ajo u kërkonte ndjesë nënës dhe babait të saj.
Dhuna ndaj grave dhe vajzave vazhdon të mbetet një fenomen shqetësues dhe një plagë e hapur për shoqërinë shqiptare. Krahas masave ligjore dhe mbrojtjes së viktimave, është e rëndësishme që në rastet kur dhunuesit paraqesin probleme të shëndetit mendor, sistemi të sigurojë edhe trajtim të specializuar psiko-shëndetësor. Ndërhyrjet terapeutike dhe mbështetja profesionale mund të ndihmojnë në adresimin e faktorëve që nxisin sjelljet e dhunshme, në uljen e rrezikut të përsëritjes së dhunës dhe në procesin e rehabilitimit. Përfshirja e trajtimit psiko-shëndetësor si pjesë e mekanizmave të reagimit institucional përbën një hap të rëndësishëm jo vetëm për mbrojtjen e viktimave, por edhe për parandalimin afatgjatë të dhunës në shoqëri.
Ky material është realizuar me mbështetjen financiare të Bashkimit Evropian në kuadër të projektit SMS Facility – Small Media Support in Western Balkans, i zbatuar nga SCiDEV. Përmbajtja është përgjegjësi e vetme e medias dhe autorit dhe nuk pasqyron domosdoshmërisht pikëpamjet, opinionet apo vlerat e Bashkimit Evropian, SCiDEV apo projektit SMS Facility. |
