Miliona jetë mund të shpëtohen thjesht duke ulur konsumin e kripës. Këtë kujton Organizata Botërore e Shëndetësisë (OBSH) ndërsa u bën thirrje shteteve 
të ndërhyjnë për përdorimin e tepërt të kripës dhe për të ulur kështu numrin e njerëzve të sëmurë nga hipertensioni, sëmundjet kardiake apo iktusi (goditja në tru).
Në kuadër të Ditës Botërore të Zemrës, që është më 29 shtator, OBSH u bën thirrje qeverive që të veprojnë për të ulur sëmundjet jo të transmetueshme që përfshijnë nëntë objektivat globalë, mes të cilave ulja e përdorimit të kripës me 30% brenda vitit 2025.
Nëse një objektiv i tillë do të arrihet “miliona jetë do të mund të shpëtohen nga sëmundjet kardiake, iktusi dhe nga sëmundje të tjera që lidhen me to”, u shpreh Oleg Çestnov, zv.drejtor i Përgjithshëm i OBSH-së për sëmundjet jo të transmetueshme./ Arlinda Gjypi
