Denisa Canameti, shendeti.com.al, Shëndet+
Urgjenca e kardiologjisë në QSUT lakohet shpesh për mungesat në medikamente, prishjen kohë e pa kohë të aparaturave, fluksin e madh e shpesh të panevojshëm të pacientëve si dhe mosfunksionim e triazhimit. Në kushte të tilla mungesash dhe mosorganizimi, dhuna verbale dhe fizike midis mjekëve dhe pacientëve është kthyer në një fenomen të zakonshëm.
Përveç kësaj, panoramën e kësaj urgjence e shëmtojnë edhe kushtet në të cilat ofrohet shërbimi : pacientë korridoreve, nëpër karrige e kushte të tjera aspak të përshtatshme për të dhënë mjekim.
Për këtë situatë mjekët fajësojnë pacientët të cilët edhe kur nuk janë urgjencë vijnë për të shmangur sistemin e referimit.
“Pacientët vijnë në këmbë dhe thonë, kemi ardhur urgjencë, ne jemi të detyruar tu shërbejmë por ky pacient mund të menaxhohet shumë mirë edhe nga mjeku i familjes. Gjithë këtë e bëjnë për të bërë një eko, për të bërë analizat shpejt e shpejt etj. Kështu shtohet fluksi, nuk ka vende dhe krijohet ajo situatë që krijohet” shprehen mjekët.
Nga ana e tyre pacientët fajësojnë mjekët. Si duket në këndvështrimin e pacientëve, vazhdon të ekzistojë besimi se fajin gjithmonë e ka mjeku.
Gazeta “Shëndet+” sjell edhe një herë në vëmendje urgjencën e kardiologjisë në QSUT. Një minialbum fotosh të cilat tregojnë të zhveshur situatën në një shërbim i cili është ndër më të investuarit në shëndetësi.
