Elona Tereziu, “Shëndet+”
Shërbimi i Urgjencës së Sëmundjeve të Brendshme në QSUT po përballet me një fluks të lartë pacientësh të cilët paraqiten çdo ditë për të marrë mjekimin e nevojshëm.
Në një vëzhgim të kryer nga gazeta “Shëndet+” rezulton se mungesa e shtretërve bën që vizitat të realizohen në sallën e pritjes. Konsultime, matje tensioni, marrje gjaku, e gjer në vizita të mirëfillta, u ofrohen pacientëve në mënyrën më pak komode të mundshme, të ulur në stolat e sallës së pritjes.
Nuk është çudi të dëgjosh edhe ndonjë frazë të tillë nga doktorët “Çohu shpejt të zësh krevatin para se të ta zërë ndonjë tjetër”, në kushtet ku pacientët zor se mund të qëndrojnë gjatë në karrige.
Zonja Tefta vuan nga zemra dhe kryen lëvizje gjysmë të paralizuara, ndërkohë që pret e ulur për më tepër se një orë në sallën e pritjes, ku po ashtu merr edhe shërbimin e nevojshëm.
Ndërsa ka edhe nga ata të cilët në pamundësi për të qëndruar ulur, improvizojnë stolat në kushtet ku gjetja e një krevati të lirë është thuajse e pamundur.
