Gjatë gjumit tretja ngadalësohet. Ushqimet me erëza (ose pikante) normalisht duan më shumë kohë për t’u tretur. Si rrjedhojë, nëse i konsumoni para se të flini, do të jetë edhe më e vështirë për ju të kaloni një natë të qetë.
Supozohet që gjumi të shërbejë për çlodhjen dhe rikuperimin e trupit, por konsumimi i ushqimeve me erëza mund ta vështirësojë këtë proces dhe të bëjë që të zgjoheni shpesh gjatë natës. Si rezultat do të bëni pak gjumë dhe të nesërmen do të ndiheni të lodhur.
Gjithashtu, një mënyrë tjetër negative se si ndikojnë këto ushqime, është duke ngritur temperaturën e trupit. Si rrjedhojë, trupi e ka të vështirë të balancojë temperaturën e vet dhe ul cilësinë e gjumit.
Sipas studimeve të kryera nga ekspertët e fushës, ushqimi me erëza shkakton mankthe apo ëndrra të këqija. Sipas Tore Nielsenit, drejtor i Laboratorit të Ëndrrave dhe Manktheve në spitalin “Zemra e Shenjtë” dhe profesor në Universitetin e Montrealit, disa njerëz mund të jenë të ndjeshëm ndaj përbërjes kimike të ushqimeve me erëza.
Sugjerohet që ushqimet me erëza (pikante) të konsumohen të paktën 2-3 orë para se të flemë. /Përgatiti në shqip: Elena Beta
