“Ruajtja e indetitetit dhe promovimi i traditës, thelb për rritjen e turistëve”
Njohja e Valbonës (Tropojë) si park ndërkombëtar, promovimi i vlerave tradicionale, si dhe moslejimi i ndërtimeve jashtë kritereve janë disa nga pikat që përmban nënshkrimi i marrëveshjes mes përfaqësuesve të WWF Mesdhe dhe pushtetit lokal të zonës së Valbonës. Kjo marrëveshje u arrit pas 6 muajve punë përgatitore të projektit “Parqet Dinarike të Shqipërisë”.
Andrea Stefan dhe Rexhë Biberaj
“Ky është një moment i rëndësishëm për të ardhmen e trashëgimisë natyrore të zonës së Valbonës. Kjo marrëveshje shënon fillimin e procesit që do të vendosë Valbonën në hartën e parqeve europiane më të vizituara. Certifikimi si park europian me turizëm të qëndrueshëm është mjet i shkëlqyer për promovimin e turizmit dhe zhvillimin e ekonomisë së zonës. Kështu njerëzit dhe natyra punojnë për të bërë më të mirën për Valbonën”, u shpreh Andrea Stefan, përfaqësuese e WWF në takimin e saj të zhvilluar këto ditë në këtë zonë.
Ndërsa përfaqësuesit e pushtetit lokal të Valbonës u shprehën se marrëveshje të tilla janë të domosdoshme për ruajtjen e natyrës dhe zhvillimin e zonës.
Pamje nga lumi Valbonë
“Ne jemi krenarë që t’ju tregojmë vlerat e bukuritë e Valbonës të gjithë turistëve. Por mbi të gjitha duam që vizitorët e huaj dhe vendas të njohin mikpritjen e malësorit dhe thesaret e kulturës sonë”, u shpreh Rexhë Biberaj, kryetar i komunës Margegaj.
Në këtë takim morën pjesë përfaqësues të pushtetit lokal dhe WWF Mesdhe, si dhe përfaqësues të medias, në mbështetje të promovimit të vlerave të kësaj zone, përmes ruajtjes së identitetit, por edhe promovimit të traditës.
Ekpsertët e WWF do të mbështesin grupet e interesit të zonës së Valbonës për të ngritur një model turizmi në parqet kombëtare që mund të ndiqen në të ardhmen nga 14 parqe të tjera të Shqipërisë./ Esido Barkaj
