Deputeti i PD Bardh Spahia, me profesion mjek, jep sërish alarmin për mungesën e medikamenteve jetëshpëtuese.
Dy ditë më parë, Spahia tha se në Qendrën Spitalore Universitare “Nënë Tereza” mungon prej më shumë se dy javësh Trinitrina (nitroglicerina), një medikament jetik për pacientët me probleme me zemrën (lexo këtu).
Ndërsa sot ai ka denoncuar mungesën e një tjetër medikamenti jetëshpëtues në farmacitë e vendit. Bëhet fjalë për sintromin, medikament po ashtu i rëndësishëm për pacientët me sëmundje të çrregullimit të zemrës dhe koagulimit të gjakut, ku sipas deputetit mungon prej 2 muajsh në farmacitë e vendit,
“Medikamenti Sintrom (Acenocoumaroli) 0.4 mg mungon prej 2 muajsh në farmacitë e vendit, duke bërë të pamundur ekzekutimin e recetave për të sëmuret kronike me sëmundje të çrregullimit të zemrës dhe patologjive të koagulimit. Këta të sëmurë detyrohen të blejnë nga xhepi i tyre barna alternative të Sintromit.
Theksojmë këtu që Sintromi është jetëshpëtues për shumë pacientë e sidomos për ata të operuar për valvolat kardiake”, denoncon deputeti Bardhi.
Ndërkohë ai ka publikuar edhe denoncimin e një qytetari tjetër, ku krahas ilaçit Sintrom përmend edhe ilaçe të tjera që mungojnë në farmacitë e vendit, si Lorazepami dhe Clonazepami, për të sëmurët kronikë me probleme nervore./ Shendeti.com.al
