Me të nxehtin dhe rrezet e diellit vjen edhe rreziku i dehidratimit, sidomos për fëmijët dhe të moshuarit. Lodhje, përzierje, dhimbje koke, ulje përqendrimi dhe rënie të energjive janë vetëm disa nga shqetësimet më të zakonshme.
Një zgjidhje ekziston ama: konsumim i shumë frutave dhe perimeve të stinës, të pasura me elemente të afta për ta ndihmuar organizmin të përballojë temperaturat shumë të larta të këtyre ditëve. Frutat dhe perimet janë në fakt burimi më i mirë i ujit biologjik.
Ekspertët rekomandojnë në çdo rast pirjen e 1,5 deri 2 litra ujë në ditë (në fakt është një përllogaritje 1 litër ujë për 30 kg peshë) për të ulur rrezikun e dehidratimit gjatë ditëve më të nxehta të vitit. Rreth 65% e organizmit tonë është e përbërë nga uji dhe gjatë këtyre ditëve humbja është vërtet e madhe prandaj është e rëndësishme që të merret ujë me shumicë.
Këshillohet edhe shmangia e pijeve alkoolike dhe ushqimeve picante, si dhe kufizimi i pijeve të gazuara dhe ëmbëlsirave. Është mirë të kujtoheni që hera-herës të lagni kokën, sidomos nëse ndodheni nën ndikimin e diellit dhe këshillohet dalja herët në mëngjes ose pasdite vonë, pra në orët kur temperaturat janë të ulëta.
Është e rëndësishme ndjekja e një regjimi ushqimor të mirë: ngrënia e ushqimeve të lehta me përmbajtje të lartë uji dhe fibrash si fruta e perime. Kështu që karrotat, sallata, çikoria, marulet, pjeprat, specat, domatet, kajsitë, pjeshkat dhe bostanat janë të preferuarit për një përqendrim energjish, vitaminash, kripërash minerale dhe uji.
