Denisa Canameti, Elona Tereziu gazeta “Shëndet+”
Shërbimi i onkologjisë si duket nuk është vetëm makthi i pacientëve, por edhe i drejtuesve të shëndetësisë. Ndoshta kjo është arsyeja që asnjë media nuk u lajmërua sot për ardhjen e Ministrit të Shëndetësisë, Ilir Beqaj, në QSUT, në këtë shërbim. Ndërsa vetë personeli mjekësor ishte lajmëruar dje pasdite.
Një gatishmëri e jashtëzakonshme e mjekëve, infermierëve, drejtuesve të shërbimit, sanitareve e koordinatorëve që në orët e para të mëngjesit. Orari i saktë nuk dihej.
Pas disa orëve pritje, ministri vjen bashkë me deputeten Klodiana Spahiu. Ndërsa ajo që binte në sy ishte mungesa e drejtoreshës së QSUT-së, Ogerta Manastirliu.
Pavarësisht përpjekjeve për të mos rënë në sy as të medieve e as të pacientëve, këta të fundit nuk e kursyen ministrin Beqaj.
Një prej familjarëve i zuri rrugën dhe i tregoi një qese me ilaçe që i kishte blerë në farmacitë përreth. Citostatikë të blerë jashtë spitalit, pa pullë.
I zënë ngushtë, ministri i merr numrin e telefonit dhe i premton që do ta telefonojë në darkë, por nuk interesohet as për emrin e citostatikëve, as për farmacinë që i tregton. Duket se kreu i shëndetësisë është i vetëdijshëm për dështimin në garantimin e barnave të sigurt, cilësorë dhe efikas.
Aktiviteti vazhdoi qetësisht, pa praninë e kamerave dhe me një kujdes maksimal për shmangien e situatave të ngjashme.
Gazetarja: Çfarë i kërkove ministrit?
Familjari: Ilaçe
Gazetarja:Çfarë të tha?
Familjari:Më merr pasdite në telefon ose të të bëj unë telefon.
Gazetarja: I bleve këto ilaçet?
Familjari: I bleva. 116 mijë lekë.
Gazetarja: Kë telefonoi ministri?
Familjari: Shënoi numrin tim të telefonit dhe asgjë tjetër. Kemi dy javë me këtë punë (tregon ilaçet dhe faturën). Kam gruan e sëmurë aty nuk lëviz dot, për të shtruar nuk e shtrojnë.
