Fëmijët e pediatrisë në Qendrën Spitalore Universitare “Nënë Tereza” kanë kaluar sot disa çaste ndryshe. Policia e Shtetit u bëri një surprizë shumë të këndshme vogëlushëve të shtruar në këtë spital.
Të veshur si “Batman” dhe “Spiderman”, policët kanë përshëndetur fëmijët duke zbritur nga tarraca e godinës së pediatrisë, më pas janë ulur pranë vogëlushëve për t’i përshëndetur nga afër.
Një pjesë e fëmijëve kanë zbritur poshtë për të shijuar këtë aktivitet, ndërsa të tjerët, me probleme më të rënda shëndetësore, e kanë shijuar shfaqjen nga dritaret e dhomave ku qëndrojnë të shtruar.
Policët u kanë dhuruar edhe logon e Policisë së shtetit, me mbishkrimin “Ti je heroi ynë”.
