Një mjeke e cila është duke vizituar një fëmijë kërcënohet dhe i bërtitet nga një burrë, i cili i kërkon llogari pse pranoi lekë nga një i afërm i tij për një vizitë. Një video e hedhur në rrjetet sociale, e cila akuzon për korrupsion mjeken e urgjencës së Pediatrisë, në fakt nxjerr fare zbuluar sesa të kërcënuar janë mjekët që punojnë aty.
Një burrë hyn në zyrën e mjekes, e cila është duke vizituar një fëmijë, dhe i bërtet dhe e kërcënon, madje duke i futur edhe dorën në xhepin e bluzës së bardhë. “Pse i more lekë?” është pyetja e personit që bërtet, ndërkohë që rri me telefon në dorë duke regjistruar. Nga ana tjetër, mjekja e pyet: “Kujt i kam kërkuar lekë?” Burri i fut dorën në xhep mjekes që po viziton fëmijën dhe i merr që aty një 200-lekësh të cilën e nxjerr para kamerës, për të treguar që dikush ka futur ato para në xhepin e mjekes.
E publikuar në rrjetet sociale me thënien: “Ja si merren lekët pa pikë turpi në Spitalin Pediatrik të Tiranës. SHËNIM: Nuk kemi gjë personale me infermieren, por me sistemin”, në fakt videoja nxjerr më shumë në pah rrezikun që u kanoset çdo ditë bluzave të bardha.
https://www.youtube.com/watch?v=FQ7WaeRCVEo
