Denisa Canameti
Komisioni i Çështjeve Sociale është kthyer në një arenë debati midis opozitës dhe ministrit të Shëndetësisë, Ilir Beqaj. Ky i fundit është vënë përballë shumë akuzave të bëra nga opozita lidhur me skandalin e 1.5 
miliardë lekëve me rimbursimin e ilaçeve. Edhe pse kjo çështje e diskutuar u cilësua si politike, deputetja e PD-së Vokshi u përgjigj se zhdukja në xhepat e 6 farmacive dhe klientëve e 1.5 miliardë lekëve nuk ka të bëjë me politikën. “Ju duket politikë kur janë zhdukur në xhepat e 6 farmacive dhe klientëve 1.5 miliardë lekë? Nuk është akuzë e imja, është e njësisë anti-korrupsion të vetë Kryeministrit”, tha Vokshi. Kësaj akuze ministri nuk iu përgjigj duke e kaluar situatën në heshtje.
Tjetër çështje për të cilën u debatua ishte edhe cilësia e barnave. “Njerëzit po marrin medikamente të alternativës së dytë, sepse e para është jocilësore dhe nuk jep efektin. Dhe shqiptarët sot po blejnë përkeqësimin e shëndetit të tyre. Dua një përgjigje. Keni dijeni sa është konsumi i këtyre medikamenteve dhe pse janë larguar firma prestigjoze dhe kanë ardhur ca firma fantazmë”, u shpreh deputetja Albina Deda. Përballë kësaj pyetjeje, Beqaj përsëriti edhe një herë tjetër sfidën që i hapi opozitës në parlament: Nëse kjo e fundit di vetëm një emër bari, të dalë e ta thotë me zë e figurë.
