Ilir Beqaj nga sot nuk do të jetë më ministër i Shëndetësisë. Kryeministri Edi Rama ka konfirmuar largimin e Beqës nga sektori i shëndetësisë.
Gjatë ‘Komunikimit Javor’ në Facebook, Rama sqaroi se largimi i 4 ministrave nga kabineti qeveritar, mes tyre edhe ministri Beqaj, është bërë për arsye të fushatës elektorale. Nuk është bërë ende i ditur ministri i ri që do të jetë në krye të shëndetësisë, një nga sektorët më problematikë.
Ilir Beqaj ka qenë në krye të sektorit të shëndetësisë që në vitin 2013. Gjatë detyrës së tij si ministër, ai ka dhënë tre koncesione të mëdha dhe të shumëdebatuara me vlerë të përbashkët prej 29.7 miliardë lekësh (212 milionë euro) ndërsa së fundmi ka përgatitur edhe një koncesion tjetër me vlerë 8.9 miliardë lekë.
Ndonëse ka qenë në qendër të kritikave, ku është akuzuar edhe për përfshirje në afera korruptive me tenderët në shëndetësi, ministri Beqaj është marrë gjithnjë në mbrojtje të hapur nga kryeministri dhe është lëvduar prej tij për punën e bërë.
