Njihuni me Kim Tuçi, 26-vjeçarja që do të bëhet së shpejti nënë e pesënjakëve. Ajo është nënë e dy vajzave të vogla dhe po pret tani edhe pesënjakë. 
Nëna australiane tregon për lexuesit e blogut “Surprised With Five” përvojën e saj të paharrueshme që nga momenti kur mori lajmin se po pret pesënjakë. Asaj i duhet të ushqehet që të marrë tre herë më shumë kalori në ditë për të arritur sasinë e rekomanduar.
Postimet e saj në internet, që lidhen me dhimbjet, përzierjet, ndryshimet në trup, të shkuarit në banjë rreth 12 herë çdo natë etj, kanë grumbulluar më shumë se 123000 ndjekës, pjesa më e madhe e të cilave janë nëna.
“Po bëhet gjithmonë e më e vështirë, pasi dhimbjet shtohen dita-ditës. Më dhemb çdo pjesë e trupit,” shprehet 26-vjeçarja.
Kur Kim zbuloi se ishte shtatëzënë dhe doktori i tha se kishte binjakë, u gëzua shumë. “Ishte shumë emocionuese! Binjakë! Isha e emocionuar nga mundësia për të pasur binjakë, por absolutisht asgjë në këtë tokë nuk më kishte përgatitur se çfarë do të ndodhte,” tha Kim.
“Kur kërkova një tjetër pamje të fëmijëve për t’i parë më qartë, doktori pa 5 zemra të ndara. Këmbët e mia filluan të dridheshin, dolën jashtë kontrollit. Ai më tha se kisha pesënjakë,” tregon Kim.
“Thirra menjëherë bashkëshortin, por si duket nuk më besoi në fillim. Erdhi menjëherë. Unë munda të vërej mërzitjen në fytyrën e tij teksa më thoshte: ‘Ne mund t’ia dalim’.
“Është e vështirë të pranosh që jeta do të ndryshojë përgjithmonë, dhe familja ime e vogël do të bëhet e madhe me një goditje,” tha ajo.
Përshtati për gazetën “Shëndet+”: Blertina Koka/ Burimi: Daily Mail
