Një ekip kirurgësh në Spitalin e Përgjithshëm të Masaçusets ka kryer pak ditë më parë transplantin e parë në botë të veshkës së derrit të modifikuar gjenetikisht te një njeri i gjallë.
Kirurgu Fabjan Mustafaj tha në emisionin tha në emisionin GoodMorning Albanians në Euronews Albania se rasti në fjalë është eksperimental dhe do të dojë kohën e vet për të kuptuar nëse do të funksionojë.
“Janë teste eksperimentale; prej vitesh provohet, para 2-3 vjetësh është bërë një transplant i tillë, ndërsa procedura e transplantit është e afirmuar prej vitesh. Kërkon kohën e vet se ka disa faza të flakjes së organit, por jemi herët, jemi në fazën eksperimentale, bëhet vetëm në rastet kur nuk ka alternativë tjetër trajtimi”, tha mjeku.
Kirurgu Mustafaj shprehet se do të duhet një kohë e gjatë, minimalisht 20 vjet kjo procedurë do të mund të aplikohet edhe në Shqipëri.
“Aplikimi i kësaj procedure do shumë vite, shumë kohë dhe zhvillime të shumta, kërkon 20 vite që të bëhet në Shqipëri, 30-40 vite, kërkon shumë, shumë kohë. Derrat të cilëve iu merren organet duhet të jenë të modifikuar gjenetikisht. Ka shumë kundërshti nga lëvizjet e kafshëve sa i përket kësaj procedure, ka shumë probleme si nga ana etike, ana ligjore, mjekësore nuk është aq e thjeshtë dhe rezultatet do i shikojmë mbas muajve dhe viteve”, tha mjeku.
