Presidenti i Shteteve të Bashkuara, Donald Trump, deklaroi të hënën nga Zyra Ovale se mjekëve në SHBA do t’u rekomandohet të mos përshkruajnë më qetësuesin Tylenol për gratë shtatzëna, duke përmendur një lidhje të diskutueshme mes këtij ilaçi dhe autizmit.
Në konferencë së bashku me Sekretarin e Shëndetësisë, Robert F. Kennedy Jr., Trump tha se përbërësi aktiv i Tylenol-it, paracetamoli (i njohur në SHBA si acetaminophen), “nuk është i mirë” për gratë shtatzëna dhe se duhet përdorur vetëm në raste të temperaturës së lartë.
Megjithëse disa studime kanë sugjeruar një lidhje të mundshme mes përdorimit të Tylenol gjatë shtatzënisë dhe autizmit tek fëmijët, këto gjetje mbeten të paqarta dhe të paqëndrueshme. Kompania prodhuese e Tylenol-it, Kenvue, ka mbrojtur sigurinë e ilaçit, duke deklaruar për BBC se:
“Besojmë se shkenca e pavarur dhe e saktë tregon qartë se acetaminophen nuk shkakton autizëm. Nuk pajtohemi me sugjerime të tilla dhe jemi të shqetësuar për rrezikun që kjo mund të paraqesë për shëndetin e grave shtatzëna.”
Kompania gjithashtu shtoi se acetaminophen është një nga qetësuesit më të sigurt për gratë shtatzëna dhe se ndalimi i tij mund t’i detyrojë gratë të zgjedhin mes dhimbjes dhe përdorimit të barnave më të rrezikshme.
Gjatë deklaratës, Kennedy tha se Administrata Amerikane e Ushqimit dhe Barnave (FDA) do të lëshojë një njoftim për mjekët lidhur me rrezikun e mundshëm të përdorimit të Tylenol gjatë shtatzënisë. Ai gjithashtu njoftoi se FDA do të nisë procesin për ndryshimin e etiketës së sigurisë së ilaçit dhe do të ndërmarrë një fushatë ndërgjegjësimi për publikun.
Në të njëjtën kohë, Kennedy tha se FDA do të miratojë së shpejti ilaçin Leucovorin, një medikament i vjetër që përdoret zakonisht për të mbrojtur pacientët me kancer nga efektet anësore të kimioterapisë, për trajtimin e fëmijëve me autizëm.
Komisioneri i FDA-së, Marty Makary, u shpreh se miratimi do të bazohet në studime që sugjerojnë se Leucovorin mund të ndihmojë fëmijët autikë që kanë mungesë të acidit folik (një formë e vitaminës B) të përmirësojnë aftësinë e tyre për të komunikuar verbal.
