Sa më shumë mish të kuq të hani, aq më i lartë është rreziku i vdekjes së parakohshme nga nëntë sëmundje të ndryshme, sipas një studimi të ri shkencor amerikan.
Në veçanti, konsumi i lartë i mishit të kuq si të përpunuar ashtu edhe të papërpunuar (mish viçi, qengji, derri) rrit rrezikun e vdekjes nga kanceri, sëmundjet e zemrës, sëmundjet e frymëmarrjes, goditja në tru, diabeti, infeksionet, sëmundja e Alzheimerit, sëmundja e veshkave dhe sëmundja e mëlçisë.
Studiuesit, të udhëhequr nga Dr. Aras Etemanti i Departamentit të Epidemiologjisë dhe Gjenetikës së Kancerit të Institutit Kombëtar të Kancerit të SHBA-së, të cilët publikuan studimin përkatës në British Medical Journal, sipas New York Times, analizuan të dhëna mbi mbi 536,000 persona të moshës 50 deri në 71 vjeç, duke lidhur dietën dhe shëndetin e tyre gjatë një periudhe 16-vjeçare.
U zbulua se ata që hanin më shumë mish të kuq kishin mesatarisht 26% më shumë shanse për të vdekur nga nëntë shkaqet e mësipërme, krahasuar me ata që hanin më pak mish të kuq.
Nga ana tjetër, ata që hanin më shumë mish të bardhë (shpendë, peshk) kishin mesatarisht 25% më pak rrezik për vdekje të parakohshme nga shkaqe të ndryshme, krahasuar me ata që hanin më pak mish të bardhë.
