Ju e dini që shenja si vështirësia në frymëmarrje ose dhimbja në gjoks kërkojnë vëmendje të menjëhershme mjekësore. Por ka të tjera që, ndërsa është më e lehtë t’i injorosh, duke menduar se nuk tregojnë rrezik, në të vërtetë meritojnë vëmendje të menjëhershme.
Lodhje që vazhdon
Ndjenja e lodhjes ose e plogështisë pas një nate pa gjumë të mirë nuk është asgjë për t’u shqetësuar. Por lodhja që vazhdon pavarësisht përpjekjeve tuaja për të pushuar ose që ju pengon të kryeni aktivitetet tuaja të përditshme mund të jetë një shenjë e një sëmundjeje të zakonshme, si gripi.
Kur këto simptoma vazhdojnë për më shumë se dy javë, është e rëndësishme të kërkoni ndihmë profesionale dhe të ndiqni udhëzimet e tij.
Shtim në peshë i pashpjegueshëm
Shpesh disa kilogramë të tepërt mund të barazohen me një ushqim më shumë se zakonisht ose me pak kënaqësi festive. Madje ka raste kur shtimi në peshë mund të jetë plotësisht normal. Por kur nuk mund ta kuptoni dot se nga vijnë kilogramët e tepërt, është mirë të kontaktoni mjekun tuaj.
Djersitje e rëndë
Djersitja e madhe nuk është vetëm bezdisëse. Nëse djersitni kur nuk jeni duke ushtruar dhe nuk është vapë jashtë, kjo mund të jetë shenjë e problemeve me tiroiden, diabetit, çrregullimeve të sistemit nervor, infeksioneve ose në raste të rralla, kancerit.
Gjithashtu, djersitja e pashpjegueshme ose e papritur mund të lidhet edhe me afshe të nxehta gjatë menopauzës.
Lodhje e rëndë gjatë ushtrimeve
Nëse papritmas e gjeni veten më të lodhur se zakonisht gjatë stërvitjes suaj të rregullt, kjo nuk do të thotë që e keni humbur formën brenda natës. Është e mundur që gulçimi juaj të jetë shkaktuar në fakt nga astma, veçanërisht nëse kolliteni ose përjetoni fishkëllima ose ngushtësi në gjoks, sipas Kolegjit Amerikan të Alergjisë, Astmës dhe Imunologjisë.
Në raste të rralla, gulçimi gjatë ushtrimeve mund të lidhet me sëmundjet e zemrës. Këto simptoma treguese kanë më shumë gjasa të jenë të rëndësishme për dikë që është në rrezik të shtuar për sëmundje kardiovaskulare për shkak të presionit të lartë të gjakut, kolesterolit të lartë ose diabetit.
