Shumë njerëz ende nuk e kuptojnë se sa e rëndësishme është për trupat e tyre të fjeturit mirë. Gjatë gjumit, trupi ripërtërihet. Pa gjumë të mirë dhe cilësor mund të vihet në rrezik shëndeti. Gjumi i keq mund të sjellë shumë probleme shëndetësore. Një gjumë jo i mirë do të ndikojë trupin dhe mendjen.
Lumturi Mërkuri
Nëse nuk flihet apo nuk bëhet një gjumë cilësor kjo mund të çojë në:
- dobësim të sistemit imunitar,
- funksionim jo të rregullt të sistemit nervor
- ulje të nivelit të hormoneve
- ulje të humorit
- ulje të përqendrimit
- humbje të kujtesës
- si dhe i pasojave të lidhura me të gjitha më lart
Mungesa e gjumit do të fillojë të ndikojë në aktivitetin e përditshëm të individit, çon drejt të qenit i përgjumur dhe nervoz. Shpeshherë pagjumësia të bën të prirur për aksidente të ndryshme.
Ka shumë shkaqe për gjumë të trazuar – dhomë gjumi shumë e nxehtë apo shumë e ftohtë, set gjumi (dyshek-jorgan-jastëk-çaçaf) të papërshtatshëm, drita e fortë, zhurma makine, afashe të nxehtë të menopauzës, kafe ekspres para gjumit, fëmija i sapolindur që të zgjon disa herë natën, fqinjë të pandjeshëm etj.
Megjithatë, shkaqet e çrregullimeve të gjumit (vështirësi për të të zënë gjumi, gjumë i ndërprerë, zgjim natën dhe vështirësi për të fjetur përsëri) nuk janë gjithmonë aq të qarta.
Një pjesë e mirë e çrregullimeve të gjumit janë të lidhura pikërisht me stilin e jetesës dhe që ne kemi mundësi për të pasur ndikim në to.
