Përshtati për gazetën “Shëndet+”: Blertina Koka
Nëse një mashkull do të jetojë më gjatë, duhet të martohet me një femër inteligjente, thotë shkenca. Ekspertët e sëmundjes së dementias thonë se martesa me një partner inteligjent mund të shërbejë si “parandalues” i sëmundjes. Mjedisi dhe shoqëria gjithashtu luajnë rol të rëndësishëm tek zhvillimi mendor i një personi.
Studime të ndryshme kanë treguar se stimulimi intelektual që mban trurin aktiv mund të ndihmojë në zhdukjen e simptomave të dementias.
“Për të jetuar sa më gjatë, një mashkull duhet të martohet me një femër inteligjente. Nuk ka kurë më të mirë sesa inteligjenca”, thotë Lawrence Whalley, profesor i shëndetit mendor tek Kolegji i Mjekësisë dhe Shkencave të Jetës tek Universiteti i Aberdeen.
Ndërsa studimet e mëparshme janë fokusuar tek përfitimet që i sjellin shëndetit mendor aktivitete si leximi, fjalëkryqet dhe vizitimi i muzeve, profesori Lawrence Whalley thotë se edhe martesa me një partner inteligjent mund të ndihmojë në parandalimin e alcajmerit.
“Faktorët mjedisorë gjatë fëmijërisë, si profesioni i babait, kanë po të njëjtin efekt tek fëmija ashtu si dieta ushqimore e nënës gjatë shtatzënisë. Koefiçenti i inteligjencës në fëmijëri, të ardhurat nga puna, edukimi etj të gjitha kanë ndikim me kalimin e viteve”.
Ndërsa largimi nga jeta i një pjesëtari të familjes kur jeni fëmijë mund të rrisë shanset për zhvillimin e sëmundjes me kalimin e viteve. “Studimet kanë treguar se vdekja e nënës para moshës 5 vjeç është një faktor risku për zhvillimin e alcajmerit me kalimin e viteve”, shpjegon profesori Whalley.
Burimi: Daily Mail / https://shendeti.com.al/
