Urdhri i Ministrisë së Shëndetësisë për marrjen e barnave të rimbursueshme pranë ambjenteve spitalore ka sjellë dhe reagimin e qytetarëve. Përmes gazetës “Shëndet +”, znj Sabahete Kodra dhe qytetari me iniciale B.H shprehen se po hasen me një sërë procedurash burokratike të cilat sorollasin me qindra qytetarë në marrjen e këtyre medikamenteve nga pacientët të sëmurë nga veshkat.
Sipas tyre, kjo procedurë ka rreth një muaj që po aplikohet, ku të gjithë qytetarët duhet të paraqiten pranë zyrës në QSUT-së për të marrë recetën e barnave. Më pas kjo letër duhet firmosur nga mjekët nefrologë të këtij pavioni dhe më pas medikamentet merren në farmacitë e QSUT-së.
Zonja Sabahete shprehet se shpeshherë punonjësit nuk janë në vendin e tyre të punës dhe qytetarët duhet t’i presin jashtë derës për shkak të radhës.
Sipas saj, metoda e vjetër ku pacientët paraqiteshin pranë mjekut të familjes për të marrë recetën e barnave me rimbursim, ishte metodë më lehtësuese, sidomos për moshat e treta. Megjithatë, pacientët shprehen se medikamentet janë marrë këtë muaj, por janë skeptikë për muajt në vijim nese spitali do të arrijë të rimbursojë të gjithë qytetarët.
