Gazmira Sakajani, infermiere
Infermieri si profesionist luan një rol shumë të rëndësishëm në shëndetin në tërësi. Sipas të dhënave nga burime serioze literature, afërsisht 70 % të kujdesit shëndetësor ndaj pacientit është pjesë e punës së infermierit (Raporti, OBSH 2015). Çdo shërbim dhe disiplinë shëndetësore ka specifikën e saj dhe normalisht përveçse edukimit, trajnimit dhe përditësimit të njohurive e deri te specializimet përkatëse specifike përbëjnë formimin e infermierit si profesionist në specialitetin përkatës. Kujdesi shëndetësor për pacientët neurologjik dhe shëndetin mendor është një specifikë e veçantë dhe gjithashtu përbën një sfidë në punën e përditshme. Kemi të bëjmë me një nga përbërësit kryesor të shëndetit në tërësi, sipas përkufizimit edhe nga OBSH që shëndeti është një mirëqenie e plotë fizike dhe mendore përkatësisht: ‘Gjendja e mirëqenies së plotë fizike, mendore dhe shoqërore dhe jo thjesht mungesa e sëmundjeve apo e pa fuqisë fizike të organizmit’.
Problemet e shëndetit mendor dhe patologjive neurologjike kërkojnë vëmendje dhe profesionalizëm, që me prezantimin me pacientin ose familjarët e pacientit, pastaj me marrjen e të dhënave të historisë mjekësore, që në gjuhën profesionale quhet anamnezë, e deri me procedurat rutinë apo të urgjencës, që nëse nuk realizohen si duhet mund të çojnë deri në humbjen e jetës së pacientit.
Disa nga problemet me rëndësi që kërkojnë vëmendje janë hemorragjitë cerebrale, traumat e kokës dhe sidomos në grupmoshat e vogla deri në 2 vjeç apo në grupmoshat e moshës së tretë që kërkojnë një kujdes dhe vlerësim profesional sa më të shpejtë, në mënyrë që të vendoset diagnoza dhe të bëhet trajtimi i duhur. Po ashtu edhe shëndeti mendor ka rëndësi dhe kërkon një vlerësim sa profesional aq edhe social e human, për fat të keq për shëndetin mendor nuk flitet shumë lirshëm.
Akoma është tabu të flitet për problemet e shëndetit mendor dhe kjo vonon në identifikimin e pacientëve në kohën e duhur, nisur nga vonesat e kërkesës së këtij shërbimi shëndetësor, po ashtu është nga mungesa e specialistëve në rang vendi për këto probleme. Depresioni, stresi, ankthi, e deri te probleme si skizofrenia apo sëmundjet bipolare, kërkojnë një kujdes, diagnozë dhe trajtim të veçantë.
Të gjitha sa u tha më lart, një rol shumë të rëndësishëm luan infermieri, që në prezantimin e parë, pastaj si pjesë përbërëse e rëndësishme e skuadrës së profesionistëve të mjekësisë dhe më vonë me edukimin dhe ndjekjen e mëtejshme të shëndetit në kujdesin shëndetësor në komunitet.
Infermieri në vendin tonë për sa i përket edukimit ka pësuar ndryshime të mëdha duke qenë nga infermierë të trajnuar për pak muaj dhe vite, deri në infermierë me arsim të lartë bachelor e master e deri në nivel të studimeve doktoraturë. Një sfidë tjetër, por edhe ndihmë njëkohësisht, është edhe nevoja e adaptimit të njohurive tona teorike e praktike me aparaturat moderne në mënyrë që t’u shërbente pacientëve në nivel sa më bashkëkohor.
