Përshtati në shqip për “Shendeti.com.al”: Marsela Aliaj
Një mbikëqyrës i qeverisë ka paralajmëruar një shqetësim për studentët në lidhje me rreziqet e përdorimit të “ilaçeve që rrisin inteligjencën”. Agjencia për Mbikëqyrjen e Produkteve Mjekësore dhe Kujdesit Shëndetësor paralajmëron se të rinjtë po luajnë me shëndetin e tyre, duke qenë se përdorin ilaçe pa rekomandimin e mjekut që të marrin nota të larta në provime.
Shumë uebsajte shesin në mënyre ilegale ilaçe si Ritalin dhe Modafinil pa rekomandimin e mjekut.
Këto ilaçe mund të shkaktojnë varësi, probleme me zemrën dhe psikozë.
Deri më tani kjo Agjenci ka mbyllur rreth 5.000 uebsajte të tilla që shesin ilaçe të palicencuara.
Modafinil është krijuar për t’u përdorur për një gjendje shëndetësore të quajtur “narcolepsy”, një çrregullim serioz i trurit që shkakton përgjumje të studentëve në kohë të papërshtatshme, ndërkohë që studentët e përdorin për të qëndruar zgjuar dhe vigjilentë.
Ndërsa studentë të tjerë marrin ilaçin Ritalin, një trajtim për çrregullime të tipit ADHD, për rritje të aftësive njohëse.
“Modafinil është licencuar për gjendje të veçanta mjekësore, jo për t’u përdorur gjatë provimeve. Mos e vendosni veten në rrezik me këto ilaçe, mund t’ju shkaktojnë efekte të rënda anësore”, thotë menaxherja e agjencisë, Lynda Scammell.
“Është një akt kriminal t’i shesësh këto medikamente pa rekomandimin e mjekët- uebsajtet që i ofrojnë ato po veprojnë në mënyrë ilegale”.
“Tregohuni të zgjuar – mos e vendosni veten në rrezik duke blerë ilaçe në internet dhe mos iu bindni një krimineli”, rekomandon ajo.
Burimi: BBC / https://shendeti.com.al/
