Përshtati në shqip për “Shendeti.com.al”: Blertina Koka
Komediani i njohur Ben Stiller ka ndarë me publikun një sekret që e ka ruajtur prej 2 vitesh. Ai zbuloi se në tetor të vitit 2014 u diagnostikua me kancer të prostatës. Aktori iu nënshtrua tre muaj më vonë një operacioni për heqjen e tumorit dhe tani është i lirë nga kjo sëmundje vdekjeprurëse.
50-vjeçari tregoi për diagnozën gjatë një interviste të dhënë për radion Sirius XM. Stiller tregon se një test antigjen për prostatën, një test gjaku që quhet ndryshe PSA, i shpëtoi atij jetën.
“Testi i hershëm më shpëtoi jetën” shkruan ai në një ese të publikuar në blogun Medium.
“Gjëja e parë që bëra kur u diagnostikova me kancer, hyra në internet për të mësuar mbi këtë sëmundje. Pashë që Robert De Niro kishte pasur gjithashtu kancer. E telefonova menjëherë atë”, rrëfen aktori.
Stiller ka vendosur të ndajë këtë sekret me publikun për t’i paralajmëruar njerëzit që të bëjnë më shpesh kontrolle tek mjeku, sepse asnjëherë nuk i dihet kur mund të prekesh nga një sëmundje vdekjeprurëse.
Burimi: CNN / https://shendeti.com.al/
