Riselma Telo
Nëse dikujt i bie rasti të kalojë në zonën e Medresesë, do të shohë patjetër bluzat e bardha brenda dhe jashtë oborrit të QSUT-së. Bluza të bardha gjen kudo, pranë stacionit të autobusit, kioskave me fruta-perime, në tregun e rrobave të përdorura, duke thyer një nga rregullat bazë të Kodit Etik-Deontologjik.
Në nenin 2, pika 7 të Kodit Etik-Deontologjik (të publikuar tek faqja zyrtare e QSUT-së) për detyrimet e etikës profesionale, përcaktohet: “Dalja jashtë institucionit me uniformën e punës është e dënueshme. Dalja jashtë ambientit të punës ul dinjitetin e tyre dhe rrit rreziqet për pacientin, dhe përbën një veprim të dënueshëm”.
Ky kod lidhet me detyrimet dhe të drejtat e profesioneve: infermier/e, mami, fizioterapeft/e, teknik/e laboratori, teknik/e imazherie, logopedist/e në veprimtarinë e tyre të përditshme për kujdesin ndaj jetës, shëndetit, lirisë dhe dinjitetit të njeriut.
Ndërsa, në Nenin 9 të këtij kodi, për “Sanksionet për shkelje të neneve të Kodit Etik-Deontologjik”, përcaktohet: “Mosparaqitja me uniformën e caktuar dhe mosmbajtja e kartës së identitetit profesional, ose dalja me uniformë jashtë vendit të caktuar, përbëjnë shkelje të Nenit 2, pika 6 dhe 7, dënohet me vërejtje, ose gjobë nga 2 000 deri 20 0000 lekë”.
Por, duket se ky vendim mbetet i shkruar vetëm nëpër letra, pasi fotot e publikuara nga “ProPacientit” faktojnë të kundërtën.
I kontaktuar nga “ProPacientit”, presidenti i Urdhrit Të Mjekëve Të Shqipërisë, Fatmir Brahimaj, e quajti aspak të drejtë këtë veprim të punonjësve.
“Punonjësit para se të dalin jashtë godinës ku ushtrojnë funksionin e tyre duhet të heqin uniformën. Uniforma e tyre në momentin e daljes jashtë institucionit bëhet e rrezikshme për bartjen e infeksioneve dhe ndonjë virusi tek pacientët të cilët ata kurojnë”, deklaron z. Brahimaj.
Ai thekson se është më shumë problem administrativ, pasi është institucioni ai që duhet të nxjerrë urdhëresa e të marrë masa për evitimin e këtij problemi dhe jo zyra e Urdhrit të Mjekut./ Shendeti.com.al
