Cili është ndryshimi midis një alergjie dhe intolerance ushqimore?
Reagimet fizike ndaj ushqimeve të caktuara janë të zakonshme, por shumica shkaktohen nga një intolerancë ushqimore dhe jo nga një alergji ushqimore. Një intolerancë ushqimore mund të shkaktojë disa nga të njëjtat shenja dhe simptoma si një alergji ushqimore, kështu që njerëzit shpesh i ngatërrojnë të dyja.
Një alergji e vërtetë ushqimore ndikon në sistemin imunitar. Edhe sasi të vogla të ushqimit mund të shkaktojnë një sërë simptomash, të cilat mund të jenë të rënda ose kërcënuese për jetën. Në të kundërt, një intolerancë ushqimore shpesh prek vetëm sistemin tretës dhe shkakton simptoma më pak serioze.
Nëse keni intolerancë ushqimore, mund të jeni në gjendje të konsumoni sasi të vogla të ushqimit pa probleme. Ju gjithashtu mund të jeni në gjendje të parandaloni një reagim. Për shembull, nëse keni intolerancë ndaj laktozës, mund të jeni në gjendje të pini qumësht pa laktozë ose të merrni pilula të enzimës së laktazës (Lactaid) për të ndihmuar tretjen.
Shkaqet e intolerancës ushqimore përfshijnë:
- Mungesa e një enzime të nevojshme për të tretur plotësisht një ushqim. Intoleranca ndaj laktozës është një shembull i zakonshëm.
- Sindroma e zorrës së irrituar. Kjo gjendje kronike mund të shkaktojë ngërçe, kapsllëk dhe diarre.
- Ndjeshmëria ndaj aditivëve të ushqimit. Për shembull, sulfitet e përdorura për të ruajtur frutat e thata, produktet e konservuara dhe verën mund të shkaktojnë sulme astme tek njerëzit që janë të ndjeshëm ndaj aditivëve ushqimorë.
Po në lidhje me sëmundjen Celiake?
Kjo gjendje kronike e tretjes shkaktohet nga konsumimi i glutenit, një proteinë që gjendet në grurë dhe drithëra të tjera. Sëmundja celiake ka disa tipare të një alergjie të vërtetë ushqimore, sepse përfshin sistemin imunitar. Simptomat shpesh përfshijnë çështje gastrointestinale, si dhe ato që nuk kanë lidhje me sistemin tretës, të tilla si dhimbje kyçesh dhe dhimbje koke. Megjithatë, njerëzit me sëmundje celiake nuk janë në rrezik të anafilaksisë.
Nëse keni një reagim pasi keni ngrënë një ushqim të caktuar, kontaktoni me mjekun tuaj për të përcaktuar nëse keni një intolerancë ose alergji ushqimore.
– Nëse keni një alergji ushqimore, mund të jeni në rrezik të një reaksioni alergjik kërcënues për jetën (anafilaksi) – edhe nëse reagimet e mëparshme kanë qenë të lehta. Mësoni se si të dalloni një reaksion të rëndë alergjik dhe dini se çfarë të bëni nëse shfaqet.
– Nëse keni intolerancë ushqimore, mjeku juaj mund të rekomandojë hapa për të ndihmuar tretjen e ushqimeve të caktuara ose për të trajtuar gjendjen themelore që shkakton reagimin tuaj./Mayo Clinic
Përktheu për Gazetën Shëndeti, Griselda Ozuni.
