Flokët e thinjura janë një ndër shenjat e dukshme të moshës. Gjithsesi, të thinjurit e flokëve nuk do të thotë medoemos se jeni në fazën e fundit të jetës. Flokët thinjen kur gjendrat e flokëve prodhojnë më pak melaninë, pigmenti që u jep ngjyrë flokëve. 
Zakonisht thinja e flokëve fillon në moshën 30 vjeç, megjithatë, ka edhe nga ata njerëz që fillojnë të thinjen që në moshën 20 vjeç. Mosha e të thinjurit lidhet me përkatësinë etnike (kaukazianët thinjen më shpejtë se aziatikët dhe afro-amerikanët), si dhe me prejardhjen (duhet të pyesni prindërit ose gjyshërit kur u kanë dalë thinjat e para).
Ka disa arsye se përse njerëzit thinjen që në moshë të re. Një arsye është duhani, i cili shkakton thinje të parakohshme të flokëve.
Faktorët mjedisorë, si rrezet ultravjollcë dhe ndotësit e ajrit mund të jenë pjesërisht shkaktarë.
Në raste të rralla, të thinjurit e parakohshëm mund të jetë shenjë e një sëmundjeje, si: anemia e shkaktuar nga fakti që trupi e ka të vështirë të përthithë vitaminën B12 ose probleme me gjendrat tiroide.
Shqipëroi për “Shëndet+”: Blertina Koka
