Rasti i Laertit, fëmijës 11-vjeçar autik, që u botua para dy numrash në gazetën Shëndet+ solli reagimin e shumë organizatave dhe qendrave shëndetësore që merren me trajtimin e këtyre fëmijëve. Këta të fundit kërkojnë vëmendjen tonë, vëmendjen e mediave për të treguar që Laerti është vetëm një rast, por si Laerti ka shumë. Laerti ishte hequr nga qendra ku merrte trajtim 
për arsye financiare. Pasi kosto e trajtimit të një fëmije autik është shumë e lartë. Qendrat flasin për një shumë 400€ në muaj (kjo me shpenzime minimale dhe paga jo të larta). Shumë e papërballueshme për familjarët ndaj edhe qendrat janë detyruar të ulin çmimet. Ndërkohë që në Shqipëri është vetëm një Qendër shtetërore kombëtare që financohet direkt nga buxheti i Minitrisë së Shëndetsisë dhe mbulon gjithë territorin e Republikës së Shqipërisë për fëmijët nga 0 deri në 6 vjeç. Kjo Qendër ka gjithsej 30 shtretër pra hospitalizohen 30 fëmijë. Ndërsa për fëmijët që jetojnë në Tiranë qendra funksionon ambulatorisht. Prevalenca e autizmit po rritet me hapa galopantë. Në shkolla mungojë logopedët, psikologët, sociologët, mësuesit ndihmës. Ky fenomen e ka gjetur shoqërinë të papregatitur pasi numri i rasteve është rritur me 30%.
Kjo situatë i ka nxitur këto qendra që të ndërmarrin një nismë për të hartuar një peticion mbi mungesën e financimeve nga shteti për shërbimet e personave me aftësi të kufizuara. Peticioni i është dërguar gjithë institucioneve përgjegjëse, përfshi këtu edhe Ministrit të Shëndetësisë, Presidentit, Kryeministrit, etj.
Ky është një Peticion mbi nevojën e Mbështetjes së Shërbimeve për Personat me aftësi të kufizuar në Shqipëri, i cili është përgatitur dhe nënshkruar nga 7 organizata ofrues të shërbimeve ditore psiko-socio-edukative për personat me aftësi të kufizuar. Ndodhur në kushte të vështira financiare ky Peticioni bën prezent gjendjen e vështirë dhe nevojën e madhe që shërbimet e ofruara prej tyre për personat me aftësi të kufizuar të mbështeten nga shteti (pushteti qendror dhe ai lokal) si një e drejtë e personave me aftësi të kufizuar dhe detyrim që shteti shqiptar ka ndërmarrë me firmosjen dhe ratifikim e Konventës së të Drejtave të Personave me aftësi të kufizuar./ D.C.
