Për gazetën “Shëndet+”, prof.dr. Alketa Koroshi
Prostata është një gjendër që ndodhet vetëm te meshkujt dhe është e vendosur poshtë fshikëzës së ujit. Ajo ka disa funksione. Prostata sekreton një lëng, i cili ndihmon dhe ushqen spermën. Vetë kjo gjendër rrethon kanalin e uretrës, që është tubi që nxjerr jashtë urinën nga fshika e ujit deri te maja e penisit.
Vetë zmadhimi me moshë i prostatës është pjesë e procesit të plakjes dhe nuk ka masa të vërteta parandaluese. Por duhet që pacienti të shmangë pirjen e lëngjeve pas orës 6 të darkës për të reduktuar urinimin e shpeshtë natën. Mirë është që të paktën të pihet një sasi normale lëngjesh, sipas ndjenjës së etjes që ka njeriu. Gjatë ditës pirja e mjaftueshme e ujit ndihmon në parandalimin e infeksionit. Po ashtu, marrja e lëngut të kranberrit (boronicës) ndihmon në parandalimin e infeksioneve të traktit urinar.
Duhet pasur parasysh se zmadhimi i prostatës nuk është kancer, as nuk e rrit mundësinë për kancer të prostatës, por nga ana tjetër mund të bashkë-ekzistojnë të dyja këto: edhe zmadhimi beninj, edhe kanceri i prostatës.
Në moshën 40-50 vjeç 25% e burrave kanë zmadhim të gjendrës së prostatës e në moshën 70-80 vjeç 80% e burrave e kanë këtë problem, por vetëm një në dhjetë veta kanë simptoma shqetësuese të prostatës e urinimit. Në Shqipëri mbi 100 mijë të moshuar kanë shenja që lidhen me zmadhimin e prostatës. Në vendin tonë afërsisht bëhen 1000 operacione në vit brenda e jashtë shtetit për heqjen e gjendrës së prostatës.
