Nga Julia Kollçaku, reumatologe
Spondiliti ankilozat (SA) ose Morbus Bekterev është një sëmundje kronike që ndikon direkt tek lëvizshmëria e shtyllës kurrizore (quhet ndryshe edhe shtylla-bambu, pasi ngrin totalisht). Në ecurinë e kësaj sëmundjeje mund të preken edhe organe të tjera.
Kjo sëmundje karakterizohet nga:
-Prania e dhimbjes së mesit dhe kufizimi i lëvizshmërisë së kolonës deri në imobilizim total. Dhimbja e mesit haset në 75% të rasteve. Pacientët ankohen për ngurtësim mëngjezor, i cili manifestohet me vështirësi në ngritjen në mëngjes nga shtrati dhe që përmirësohet gjatë aktivitetit fizik gjatë ditës.
-Imobilizimi total i kolonës (e thënë më thjesht “ngrirja” e shtyllës kurrizore) lidhet me rastin kur kolona bëhet me pamjen si shkop bambuje në aspektin radiologjik. Kolona humbet përkulshmërinë e saj dhe ka raste që pacienti nuk është në gjendje të kthejë kokën anash, duke u kthyer në këtë mënyrë me gjithë trupin, si një bllok i vetëm. Kuptohet që kjo gjendje haset në stade të avancuara të sëmundjes.
SA gjithashtu shoqërohet me:
-lodhje të përgjithshme
-kufizim të aftësive pjesëmarrëse në aktivitetet e punëve të përditshme dhe ato sociale
-dhimbje gjoksi që rëndohet gjatë kollitjes apo teshtitjes
-ndjeshmëri e shtuar ndaj dhimbjes gjatë prekjes në artikulacionet e prekura
-dhimbje e thembrave të këmbëve, sidomos në mëngjes, kur ngrihen dhe vendosin këmbët në dysheme.
Artikulacionet periferike veçanërisht ato të mëdha, si: gjuri apo bërryli mund të përfshihen gjithashtu nga SA.
Sëmundja shoqërohet dhe me shenja ekstraskeletike (jo kockore), si: sëmundjet e syrit, isufiçienca e aortës, defekte të përçueshmërisë së zemrës, fibrozë e lobeve të sipërme të mushkërisë, dëmtime neurologjike dhe të veshkave.
