Disa pacientë të dializës, në shenjë proteste për ndërprerjen e shërbimeve për ta, janë mbledhur sot në ambientet e Ministrisë së Shëndetësisë. Ata kanë kërkuar përgjigje nga ministria, ndërsa deklaruan se dërgohen për ndërhyrje te spitalet private. Nga ana tjetër, protestuesit paralajmëruan se do të shtrihen në ambientet e ministrisë derisa të marrin përgjigje nga ministri Beqaj.
“Nuk marrim nga shteti ilaçet falas. Nuk marrim shërbimin e transportit. Na dërgojnë për ndërhyrje te privati”, thanë pacientët. “Duhet ta bëjmë dializën në qytetet tona dhe jo në Tiranë”.
Në vitin 2009, Ministri i Shëndetësisë së asaj kohe, Petrit Vasili, tha në Komisionin Parlamentar të Shëndetësisë “Për mjekimin zëvendësues të funksionit të veshkës” se Ministria synon rritjen nga viti në vit të financimit dhe kontraktimit me qendra të ndryshme dialize, publike apo private, të shtrira në ato vende, ku është dhe fluksi i të sëmurëve. “Me rritjen e financimit dhe shtimin e qendrave të dializës, mendojmë që të përmirësohet akoma më tepër cilësia e shërbimit, duke kryer seancat e nevojshme të dializës të përcaktuara nga mjeku, për çdo të sëmurë”, tha ministri Vasili.
Gjithashtu në atë komision Vasili tha se transporti i të sëmurëve me veshka që vijnë nga rrethet për të marrë trajtim në Tiranë do të përfshihet në koston e shërbimit të dializës. Kjo ka qenë edhe një kërkesë e vazhdueshme e shoqatës së pacientëve të dializës.
Me shtrirjen e skemës së sigurimeve të kujdesit shëndetësor në spitale, me përcaktimin e kostove të shërbimeve, u prit se do t’i jepej zgjidhje përfundimtare edhe problemit të transportit të të sëmurëve nga banesa drejt qendrës, ku marrin shërbimin shëndetësor, duke e përfshirë koston e transportit të të sëmurëve, në koston e shërbimit të dializës.
Me sa duket, këto premtime të pambajtura nga ana e Ministrisë së Shëndetësisë kanë bërë që sot pacientët e sëmurë të protestojnë para këtij institucioni.
