Eglantina Bardhi
Veshka e tyre ka humbur pothuajse të gjitha funksionet, e për të mbijetuar duhet t’i nënshtrohen procesit të dializës. Është ky fati i qindra pacientëve në vend, të cilët tre herë në javë, për katër orë rresht, duhet të qëndrojnë të lidhur pas një aparature për të pastruar organizimin e tyre nga helmet (toksinat) e mbledhura, si pasojë e mosfunksionimit të veshkës. Por, ofrimi i këtij shërbimi në Qendrën më të madhe spitalore “Nënë Tereza”, përballet me probleme të shumta, që nuk kanë të bëjnë vetëm me stërmundimet e transportit të përditshëm të pacientëve që vijnë nga rrethet, me mungesën e medikamenteve të cilat duhet t’i blejnë vetë, por edhe me cilësinë e shërbimit që marrin përmes aparaturave të amortizuara.
Pacientët pohojnë se ndonëse procesi duhet të zgjasë katër orë, në shumë raste bëhet edhe më i shkurtër, ndërkohë që janë të detyruar që barnat apo transportin në të shumtën e rasteve t’i paguajnë vetë. Pranë QSUT-së janë rreth 300 pacientët që marrin shërbimin e dializës. Kundrejt këtyre problemeve, Shoqata e Personave me Dializë, i ka kërkuar Ministrisë së Shëndetësisë që të kthejë sytë drejt këtij shërbimi, i cili për vite me radhë është lënë në harresë, duke mos sjellë përmirësimet e duhura në shëndetin e pacientëve. Kreu i kësaj shoqate, Agim Gjyla sqaron se aparaturat që kryejnë këtë proces në QSUT janë shumë të vjetra, si rrjedhojë e mbingarkesës së krijuar në vite, seancat që duhet të kryejnë pacientët nuk i bëjnë të gjitha, medikamentet duhet t’i blejnë vetë.
Sipas tij, këto shqetësime tashmë i janë përcjellë edhe ministrit të Shëndetësisë Ilir Beqajt, e në rast se nuk do të marrin një përgjigje pozitive mbi përmirësimin e këtij shërbimi, atëherë pacientët të udhëhequr nga shoqata do të nisin protestat. Më tej, Gjyli sqaron se këto shqetësime i janë përcjellë edhe dikastereve përgjegjëse të Qeverisë, ndërkohë që e vetmja përgjigje e marrë prej tyre është se ka mungesë fondesh për të sistemuar këtë shërbim. “Aparatet te spitali QSUT-së janë mbi 15 që janë në funksion, dhe janë të amortizuara nga përdorimi i tepërt. As 50 për qind nuk bëhet cilësia e dializës, i blejmë ilaçet vetë, kryesisht jashtë shtetit.
Tani na kanë futur një ilaç, i cili e ka emrin rinvela. Ministrit Ilir Beqaj i kam kërkuar edhe para disa ditësh ilaçe dhe përgjigja e tij ka qenë që nuk ka fonde”, sqaron kundrejt kësaj problematike Agim Gjyla. Sipas ekspertëve të shëndetit një aparature nuk mund të përdoret më për dializë nëse i ka tejkaluar të 40 mijë orët e punës, pasi ka mbaruar edhe cilësia e saj. Ndërkohë që dy ditë më parë, Ministria e Shëndetësisë ka detajuar edhe kostot reale të llogaritura për dy paketat e shërbimeve, që kanë të bëjnë pikërisht me shërbimin e dializës, dhe atë të transplantit të Veshkave. Sipas përllogaritjeve të bëra kostoja reale e një seance dialize kushton rreth 72 euro, teksa numri i pacientëve që Ministria e Shëndetësisë parashikon të mbulojë me këtë shërbim mbërrin deri në 900 persona
