Kryefaqja Aktualitet Familjarët: Kemi frikë të denoncojmë mungesat e ilaçeve. Bardhi: Mjekimi e drejtë...

Familjarët: Kemi frikë të denoncojmë mungesat e ilaçeve. Bardhi: Mjekimi e drejtë ligjore

0
Shpërndaje

Pasdite ne Top Channel

Pas organizimit të shoqërisë civile përballë pediatrisë së QSUT-së, për të ngritur zërin për fëmijët me kancer, pati një sensibilizim të madh të njerëzve të thjeshtë, personave publikë si dhe vetë medias. Menjëherë pas thirrjes për ndihmë, emisioni “Pasdite në Top Channel” i ka kushtuar një vëmendje të veçantë kësaj problematike.

Në një panel ku ishin të ftuar Flutura Begaj, nëna e djaloshit që vuan nga sëmundja e rëndë e leucemisë, Eglantina Bardhi, drejtoreshë e shoqatës “Together for life”, si dhe Denisa Canameti, gazetare shëndetësie në gazetën “Shëndet plus”, u fol gjatë për arsyet e kësaj gjendje kaq të rëndë në këtë pavion.

Flutura tregoi historinë e të birit që prej 4 muajsh gjendet i shtruar në shërbimin e onkohematologjisë në QSUT. Lidhur me protestën e organizuar, ajo tregoi veç të tjerash arsyen se përse një pjesë e prindërve nuk iu bashkuan thirrjes.

“Nuk ishim shumë prindër. 9 familjar që thamë që na mungojnë shumë ilaçe. Tani aktualisht mungon asaparaginase, që nuk po e gjejmë dot as në spital, as në farmaci. Nuk guxuam te dilnim të gjithë. Kërkuam ndihmë nga shteti për shërimin e fëmijëve tanë. Vetëm medikamente. Në këto katër muaj, në spital na kanë dhënë receta dhe i kemi blerë në farmaci. Janë shumë ilaçe të shtrenjta” u shpreh Flutura.

Eglantina Bardhi theksoi në fjalën e saj se ky organizim nuk pati si qëllim tubimin me shumë njerëz, por thjesht përcjelljen e një mesazhi të fuqishëm, me shpresën se do të bjerë në veshin e duhur. “Ne duam t’i ndërgjegjësojmë pacientët që nuk po kërkojnë asgjë që nuk u takon. Askush nuk iu fal asgjë. Mjekimin e meritojnë me ligj, mund të hedhin edhe spitalin në gjyq për dëmin kolosal që iu shkakton” tha Bardhi.

Denisa Canameti foli për idenë e këtij organizimi, që sipas saj erdhi pas kontaktit me djalin 10 vjeç nga Dibra. Një fëmijë që vuan nga një sëmundje tumorale, por që fatkeqësisht është që prej shtatorit të 2015-s pa mjekim.

Gjithë hapësira televizive u shfrytëzua për të artikuluar të drejtat që duhet të njohë çdo pacient. Pasi vetëm pacientët e informuar do të dinë të kërkojnë të drejtat përtej çdo frikë të nxitur nga institucionet.

LËR NJË MESAZH

Please enter your comment!
Please enter your name here