Përgjigjja nga infermierja Aurora Bajraktari:
Në traditën tonë ekziston metoda e vendosjes së bebes në shpinë për të fjetur. Por shqetësimi që mund të ngrenë prindërit në këtë rast, është se koka e bebit mund të bëhet e sheshtë. Kjo mund të shmanget duke ndryshuar pozicionin e bebes në pjesën tjetër të kohës, kur nuk është duke fjetur. Në rastet kur bebi vendos të flejë me stomak (barkas), duhet të jetë patjetër nën vëzhgimin e të rriturve.
Fjetja me stomak mund të:
-Rrisë mundësinë që bebi të thithë frymënxjerrjen e tij dhe kështu të rrisë nivelin e dioksidit të karbonit dhe të ulë nivelin e oksigjenit.
-Mund të shkaktojë bllokim të rrugëve të sipërme të frymëmarrjes.
Pse duhet të flejë në shpinë?
Studimet tregojnë se fjetja në shpinë redukton riskun e SIDS-it (Vdekja e papritur e foshnjave). Gjithashtu, redukton riskun e aspirimit në rastet kur fëmija mund të vjellë. Pozicioni në shpinë, nga studimet e realizuara, është më i sigurt se pozicioni i fjetjes me stomak, por dhe më i sigurtë se pozicioni anash.
