Përshtati për gazetën “Shëndet+”: Blertina Koka
Sipas një studimi të kryer së fundmi, është zbuluar se edhe pse është e shëndetshme të hani peshq gjatë shtatzënisë, konsumimi i tepërt i tyre mund të rrisë rrezikun që fëmija të bëhet mbipeshë kur të rritet.
Nëse nëna konsumon produkte deti më shumë se tri herë në javë gjatë shtatzënisë, fëmijët e tyre rriten më shpejtë, megjithatë, ata kanë më shumë rrezik të bëhen obezë kur të arrijnë moshën 4-6 vjeç.
Sipas Administratës Amerikane të Barnave dhe Ushqimeve (FDA), gratë shtatzëna duhet të konsumojnë 2-3 vakte me produkte të ndryshme deti në javë, dhe duhet të shmangin disa nga llojet e peshqve.
“Mbipesha dhe obeziteti tek fëmijët konsiderohet si një ndër problemet më kryesore të shëndetit publik. Shtimi i menjëhershëm në peshë tek moshat e mitura është lidhur gjithmonë me rrezikun për t’u prekur nga obeziteti në fëmijëri dhe në moshë madhore,” shkruan shkencëtarët tek studimi.
Për të arritur në këto përfundime, shkencëtarët shqyrtuan të dhënat e mbledhura në Belgjikë, Francë, Greqi, Irlandë, Itali, Hollandë, Norvegji, Poloni, Portugali, Spanjë dhe Masaçustes. Në studim u përfshinë mbi 26 mijë femra shtatzëna dhe fëmijët e tyre. Nëna dhe fëmijët u monitoruan çdo dy vite derisa fëmijët e tyre mbushën 6 vjeç.
Pasi shqyrtuan të dhënat, shkencëtarët zbuluan se fëmijët e grave që konsumuan më shumë se tri herë në javë peshq ishin 14% më të rrezikuar për t’u bërë mbipeshë nga mosha 4 vjeç, në krahasim me fëmijët e tjerë, nënat e të cilëve konsumuan më pak peshq.
Burimi: News Independent / https://shendeti.com.al/
