Përshtati në shqip për gazetën “Shëndet+”: Blertina Koka
Edhe pse mund të jeni në hotelin më luksoz (me dyshekë të rehatshëm, jastëk të pastër, çarçafë të bardhë si bora) nata e parë e fjetjes atje as që mund të krahasohet me atë në shtratin tuaj. Ky fenomen është aq i përhapur, sa shkencëtarët i kanë vënë një emër: Efekti i natës së parë.
Shkencëtarët kanë studiuar për vite me radhë procesin e të fjetur me shpresë për të kuptuar efektin e natës së parë. Në një studim të publikuar së fundmi, një ekip shkencëtarësh amerikanë kanë zbuluar arsyen përse ndodh një fenomen i tillë. Sipas tyre, kur qëndrojmë në një ambient jo familjar, truri ynë është më vigjilent, sidomos hemisfera e majtë.
E njëjta gjë ndodh edhe me kafshët: Zogjtë flenë me njërin sy hapur dhe gjysmën e trurit zgjuar, për t’u mbrojtur nga grabitqarët. Delfinët gjithashtu alternojnë gjumin midis dy hemisferave të trurit, kështu mund të pushojnë ndërkohë që njëri sy mbikëqyr peshkaqenët.
Për të studiuar edhe më shumë këtë efekt, shkencëtarët skanuan trurin e disa vullnetarëve që fjetën në laborator. Imazhet e skanuara treguan se hemisfera e djathtë e trurit binte në gjendje gjumi, ndërsa hemisfera e majtë qëndronte aktive.
Duhet thënë se truri i njeriut është fleksibël, që do të thotë se “efekti i natës së parë” nuk është i njëjtë tek të gjithë njerëzit. Ka njerëz që nuk e kanë problem të flenë në një ambient jo familjar, ashtu siç ka edhe njerëz që nuk i zë gjumi fare.
“Truri i njeriut është fleksibël. Prandaj njerëzit që flenë shpesh në ambiente të reja nuk kanë probleme me gjumin”, shpjegon Yuka Sasaki, profesoreshë tek Universiteti Brown, në Ishullin Rhode.
Burimi: The Guardian / https://shendeti.com.al/
